క్యాన్సర్‌పై ఉమ్మడి పోరాటం జరపాలి: 'బసవతారకం' రజతోత్సవ సభలో దామోదర రాజనర్సింహ

తెలంగాణలో పెరుగుతున్న క్యాన్సర్ కేసుల నియంత్రణకు ప్రభుత్వం, స్వచ్ఛంద సంస్థలు, వైద్య నిపుణులు కలిసికట్టుగా పనిచేయాలని రాష్ట్ర ఆరోగ్య శాఖ మంత్రి దామోదర రాజనర్సింహ పిలుపునిచ్చారు. హైదరాబాద్‌లోని బసవతారకం ఇండో-అమెరికన్ క్యాన్సర్ హాస్పిటల్ అండ్ రీసెర్చ్ ఇన్‌స్టిట్యూట్ రజతోత్సవ వేడుకలకు ఆయన హాజరై ప్రసంగించారు.

ఈ సందర్భంగా మంత్రి మాట్లాడుతూ.. మారుతున్న జీవనశైలి, ఆహారపు అలవాట్లు, పర్యావరణ కాలుష్యం, జన్యుపరమైన కారణాలతో క్యాన్సర్ మహమ్మారి విజృంభిస్తోందన్నారు. రాష్ట్రంలో ఏటా 50,000 నుంచి 55,000 వరకు కొత్త క్యాన్సర్ కేసులు నమోదవుతున్నాయని, ఒక వ్యక్తికి వ్యాధి సోకితే ఆ కుటుంబం మొత్తం మానసికంగా, సామాజికంగా, ఆర్థికంగా తీవ్రంగా ప్రభావితమవుతోందని ఆవేదన వ్యక్తం చేశారు.

క్యాన్సర్‌పై పోరాటంలో భాగంగా ప్రభుత్వం ఇప్పటికే పలు కీలక చర్యలు చేపట్టిందని మంత్రి వివరించారు. క్యాన్సర్‌ను నోటిఫైయబుల్ వ్యాధిగా ప్రకటించడంతో పాటు, ప్రతి కేసును నమోదు చేసేందుకు స్టేట్ క్యాన్సర్ రిజిస్ట్రీ, క్యాన్సర్ పోర్టల్‌ను ఏర్పాటు చేసినట్లు తెలిపారు. నివారణ, ముందస్తు గుర్తింపుపై ప్రజల్లో అవగాహన కల్పించడంపై దృష్టి సారించామన్నారు. ప్రభుత్వ ఆసుపత్రులతో పాటు బసవతారకం వంటి ప్రైవేట్ ఆసుపత్రుల్లోనూ ఆరోగ్యశ్రీ ద్వారా ఉచిత, రాయితీ వైద్యం అందిస్తున్నామని, క్యాన్సర్ చికిత్స కారణంగా ఏ కుటుంబం పేదరికంలోకి జారకూడదన్నదే ప్రభుత్వ లక్ష్యమని స్పష్టం చేశారు.

25 ఏళ్లుగా క్యాన్సర్ రోగులకు అద్భుతమైన సేవలందిస్తున్న బసవతారకం ఆసుపత్రి యాజమాన్యాన్ని మంత్రి అభినందించారు. ఎన్టీఆర్ ఆశయాలను ముందుకు తీసుకెళ్తున్న ఛైర్మన్ నందమూరి బాలకృష్ణను ప్రత్యేకంగా ప్రశంసించారు.

అమరావతిలో వెయ్యి పడకల బసవతారకం క్యాన్సర్ ఆసుపత్రి: ఏపీ మంత్రి సత్యకుమార్

ప్రముఖ క్యాన్సర్ చికిత్సా కేంద్రమైన బసవతారకం ఇండో-అమెరికన్ క్యాన్సర్ హాస్పిటల్ & రీసెర్చ్ ఇన్‌స్టిట్యూట్ ఆంధ్రప్రదేశ్‌లోనూ తమ సేవలను విస్తరించనుంది. రాజధాని అమరావతిలో వెయ్యి పడకల సామర్థ్యంతో కొత్త ఆసుపత్రిని ఏర్పాటు చేయనున్నట్లు ఏపీ వైద్య, ఆరోగ్య శాఖ మంత్రి సత్యకుమార్ యాదవ్ ప్రకటించారు. హైదరాబాద్‌లోని బసవతారకం క్యాన్సర్ ఆసుపత్రి 25వ వార్షికోత్సవ వేడుకల్లో ఆయన ఈ కీలక ప్రకటన చేశారు.

ఈ సందర్భంగా మంత్రి సత్యకుమార్ మాట్లాడుతూ.. స్వర్గీయ ఎన్టీ రామారావు తన అర్ధాంగి బసవతారకం జ్ఞాపకార్థం అత్యున్నత లక్ష్యంతో ఈ ఆసుపత్రిని స్థాపించారని గుర్తుచేశారు. గత 25 ఏళ్లుగా తెలుగు రాష్ట్రాలతో పాటు దేశ నలుమూలల నుంచి వచ్చే రోగులకు, పేద, ధనిక తేడా లేకుండా నాణ్యమైన వైద్యం అందిస్తున్నారని ప్రశంసించారు. ఆసుపత్రి చైర్మన్ నందమూరి బాలకృష్ణకు, ట్రస్ట్ సభ్యులకు ప్రత్యేక ధన్యవాదాలు తెలిపారు.

ఆంధ్రప్రదేశ్‌లో క్యాన్సర్ నియంత్రణకు కూటమి ప్రభుత్వం పటిష్టమైన చర్యలు తీసుకుంటోందని మంత్రి వివరించారు. ఐదేళ్లుగా నిలిచిపోయిన గుంటూరు స్టేట్ క్యాన్సర్ సెంటర్‌ను రూ. 120 కోట్లతో ఏడాదిలోనే పూర్తి చేశామన్నారు. దీనిని ఎల్-1 క్యాన్సర్ సెంటర్‌గా అభివృద్ధి చేసి, పెట్ స్కానర్, లీనాక్ మెషీన్ వంటి ఆధునిక పరికరాలు సమకూర్చినట్లు తెలిపారు. అలాగే కడప, విశాఖపట్నంలోనూ క్యాన్సర్ సెంటర్లను ఏర్పాటు చేశామని చెప్పారు.

రాష్ట్రంలో ఏటా 40 వేల కొత్త క్యాన్సర్ కేసులు నమోదవుతున్నాయని, దీన్ని దృష్టిలో పెట్టుకుని 'ప్రివెంటివ్' విధానంపై దృష్టి సారించామన్నారు. క్యాన్సర్‌పై అవగాహన, ఉచిత స్క్రీనింగ్ పరీక్షలు నిర్వహిస్తున్నామని, ఎన్టీఆర్ వైద్యసేవ కింద చికిత్స వ్యయం రూ. 746 కోట్లకు పెరిగిందని పేర్కొన్నారు. 'సంజీవిని' డిజిటల్ ప్లాట్‌ఫామ్‌ ద్వారా వ్యాధి తీవ్రతను ముందుగానే అంచనా వేసేలా చర్యలు తీసుకుంటున్నట్లు తెలిపారు. అమరావతిలో బసవతారకం ఆసుపత్రి ఏర్పాటు కావడం హర్షణీయమని, క్యాన్సర్‌పై ప్రభుత్వ పోరాటానికి ఇది మరింత బలాన్నిస్తుందని మంత్రి సత్యకుమార్ ఆశాభావం వ్యక్తం చేశారు.